Apple ја претстави функцијата Digital ID, која овозможува создавање дигитален личен документ во Apple Wallet. Функцијата моментално е достапна само во Соединетите Држави, но од технолошки аспект претставува значаен чекор кон безбедна дигитализација на официјалните документи.
Digital ID најпрво се појавува тестирачки на безбедносните контролни пунктови на американските аеродроми, каде корисниците ќе можат да ја докажат својата идентичност со iPhone или Apple Watch, без потреба од физички документ. Ова не го заменува пасошот и не може да се користи за меѓународни патувања, но добро покажува како Apple се обидува да ги направи овие процеси поудобни, пообединети и побезбедни.
Digital ID претставува нов тип податок во Apple Wallet, по финансиските информации, клучевите и пропусниците. Системот се потпира на веќе познати безбедносни решенија: податоците од документот се чуваат локално на уредот, целосно енкриптирани, а идентификацијата се врши на веќе познатиот начин — преку Face ID или Touch ID. Корисниците секогаш споделуваат само оние информации што се потребни во конкретната ситуација, а Apple нема увид кога и каде е прикажана дигиталната идентификација.Иако во Македонија моментално не може да се додаде лична карта, возачка дозвола или пасош во Apple Wallet, насоката што ја претставува Digital ID е интересна и за нас. Таа укажува на иднина во која различни документи и клучеви сè повеќе ќе постојат во дигитална форма — било да станува збор за лична карта, картичка за пристап или клуч за автомобил. Новопретставената функција е уште еден чекор во таа насока, и со надеж дека во иднина ќе стане достапна и во Европа.
